Թվինինգ ծրագրի եզրափակիչ կոնֆերանս
Սույն թվականի մարտի 15-ին Հայաստանի ամերիկյան համալսարանում տեղի ունեցավ «Թվինինգ» ծրագրի եզրափակիչ կոնֆերանսը։
Ծրագրի նպատակը կենսաբազմազանության և բնության պահպանության բնագավառում ՀՀ օրենսդրության բարելավումն ու բնության պահպանության հարցերով պատասխատանու գերատեսչությունների արդյունավետության բարձրացումն է։
Չեխիայի բնության պահպանության գործակալությունը և Ֆինլանդիայի բնապահպանական ինստիտուտը SYKE համագործակցել են ՀՀ շրջակա միջավայրի նախարարության հետ Հայաստանի բնության պահպանության բարելավմանը միտված օրենսդրական փոփոխությունների առաջարկներ մշակելու նպատակով։ Բազմաթիվ առաջարկների թվում են պահպանվող տարածքների նոր ՝ «պահպանվող լանդշաֆտի» կատեգորիայի հիմնումը, արժեքավոր բնական էկոհամակարգերի կատեգորիայի վերաբերյալ կանոնների սահմանումը, ինչը թույլ կտա կենսաբազմազանության պահպանությունը մասնավոր սեփականություն համարվող տարածքներում։ Միջազգային փորձագետների խումբը նաև առաջարկել է բնության պահպանության ոլորտում ինստիտուցիոնալ կառուցվածքի փոփոխություններ, որոնք ի վերջո կհանգեցնեն կենսաբազմազանության պահպանության և ԲՀՊՏ-ների կառավարման համար պատասխանատու պետական գործակալության ստեղծմանը։
ՀՀ շրջակա միջավայրի նախարար պրն Հակոբ Սիմիդյանն իր խոսքում անդրադարձավ Ծրագրի գրանցած արդյունքներին՝ հավելելով․ «Կարծում եմ, որ օրենսդրական և ինստիտուցիոնալ զարգացման բնագավառներում այս Ծրագրի գրանցած արդյունքները մեզ համար կդառնան առանցքային գործիքներ ՀՀ-ի և ԵՄ-ի միջև կնքված համաձայնագրի կիրարկման համար»։
Քանի որ ՀՀ-ն Եվրոպական միության հետ ստորագրել է ՀԸԳՀ-ն (Համապարփակ և ընդլայնված գործընկերության համաձայնագիրը), երկիրը պատրաստվում է Եվրոպական միության հետ իրավական և գործնական բնույթի համագործակցությանը նպատակաուղղված որոշակի քայլեր ձեռնարկել։ ԵՄ-ի բնության վերաբերյալ հրահանգներին մոտարկումը բնության պահպանության ոլորտի նպատակն է։
«Մենք ամփոփել ենք ՀԸԳՀ-ի պահանջները և ներկայացրել Կենսամիջավայրերի և թռչունների վերաբերյալ հրահանգների հիմնական սկզբունքները «Նատուրա 2000» գործիքակազմի միջոցով՝ ներառելով նաև կենսաբազմազանության պահպանության հաջողված պատմություններին առնչվող մի քանի դեպքի ուսումնասիրություն։ Վերջիններս միտված են ՀՀ-ի բնապահպանների համար ԵՄ օրենսդրության վերաբերյալ խտացված տեղեկություններ տրամադրելուն», նշեց Չեխիայի բնության պահպանության գործակալության ներկայացուցիչ պրն Տոմաշ Ռուժիչկան։
Միջազգային և հայ փորձագետներից կազմված խումբը մշակել է ՀՀ-ի կենսաբազմազանության ռազմավարության նախագիծը։ «Մենք նաև մշակել ենք Ռազմավարության գործողությունների ծրագիրը և այժմ քննարկում ենք այն Նախարարության հետ», իր ելույթում շեշտեց Ծրագրի ղեկավար, Չեխիայի բնության պահպանության գործակալության ներկայացուցիչ պրն Դավիդ Լացինան։ Ռազմավարությունում նաև հաշվի են առնվել Կենսաբանական բազմազանության գլոբալ շրջանակի (Կունմին-Մոնրեալ) քննարկման արդյունքում համաձայնեցված թիրախները։
Կոնֆերանսի ընթացքում ներկայացված սահիկահանդեսները հասանելի են այստեղ, իսկ կոնֆերանսի տեսագրությունը հասանելի է այստեղ։
Լուսանկարները՝ ՇՄ նախարարության